saocaria

სიტყვის ძალა, სიტყვის პატრონს გულში წაეჩურჩულება: "ნუ დამხარჯავ ბოროტისთვის, თუ რამ წმიდა გეგულება ნუ გავხდებით სიბინძურის ბილწი გამოხატულება თორემ დასწვავს კეთილ გულებს უმალ ჩემი გრძნეულება სიტყვა ათასი ფერია, ასმაგი სხვაფეროვნებით გაშლილი გადაფარდული გართული გაფეროვნებით იასამანის კონაა სურნელით და ფეროვნებით სიტყვა გემოა ფიქრისა, იცანი დაგემოვნებით ავდარს დავდევ, დავთარს ვავსებ, დავთარსავ არ გაიდარებს ამგვარ საქმეს რაგვარ დავდებ? ამგვარს სხვა ვინ დაიდარებს? ვერც ზღვის ღელვა მიიტოლებს, არც გრიგალი შეიდარებს ჩემმა ძალამ გადაწყვიტოს: რა იწვიმებს, რა იდარებს პირველად იყო სიტყვა და პირველი ხელოვანება პირველ სინათლის ნაკადის, პირველი გახმოვანება საწყისი სხივთა მიზიდვის, დახრა და თაღოვანება სიცოცხლის მახარობელი, კეთილი ზრახოვანება ნუ ააგებ ბოროტებას, ნუ გახდები ღვარძლის ხურო სადაც წახვალ შეეცადე კეთილთ ქუდი დაიხურო სიტყვით გეშაქარყინულოს ენა ტკბილით გაიხურო შეეცადე მხოლოდ! მხოლოდ! მხოლოდ კეთილს მამსახურო