Hanuman ji ki jai
deep
July 21st, 2024suno
Lyrics
श्रीगुरु चरन सरोज रज, निज मनु मुकुरु सुधारि।
बरनउँ रघुबर बिमल जसु, जो दायकु फल चारि॥ 1 ॥
बुद्धिहीन तनु जानिके, सुमिरौं पवन-कुमार।
बल बुद्धि विद्या देहु मोहिं, हरहु कलेस बिकार॥ 2 ॥
जय हनुमान ज्ञान गुण सागर।
जय कपीस तिहुँ लोक उजागर॥ 1 ॥
रामदूत अतुलित बल धामा।
अंजनि-पुत्र पवनसुत नामा॥ 2 ॥
महाबीर बिक्रम बजरंगी।
कुमति निवार सुमति के संगी॥ 3 ॥
कंचन बरन बिराज सुबेसा।
कानन कुंडल कुंचित केसा॥ 4 ॥
हाथ बज्र औ ध्वजा बिराजे।
काँधे मूँज जनेऊ साजे॥ 5 ॥
संकर सुवन केसरी नंदन।
तेज प्रताप महा जग वंदन॥ 6 ॥
विद्यावान गुनी अति चातुर।
राम काज करिबे को आतुर॥ 7 ॥
प्रभु चरित्र सुनिबे को रसिया।
राम लखन सीता मन बसिया॥ 8 ॥
सूक्ष्म रूप धरि सियहिं दिखावा।
बिकट रूप धरि लंक जरावा॥ 9 ॥
भीम रूप धरि असुर संहारे।
रामचन्द्र के काज सँवारे॥ 10 ॥
लाय सजीवन लखन जियाये।
श्रीरघुबीर हरषि उर लाये॥ 11 ॥
रघुपति कीन्ही बहुत बड़ाई।
तुम मम प्रिय भरतहि सम भाई॥ 12 ॥
सहस बदन तुम्हरो जस गावैं।
अस कहि श्रीपति कंठ लगावैं॥ 13 ॥
सनकादिक ब्रह्मादि मुनीसा।
नारद सारद सहित अहीसा॥ 14 ॥
जम कुबेर दिगपाल जहाँ ते।
कवि कोबिद कहि सके कहाँ ते॥ 15 ॥
तुम उपकार सुग्रीवहिं कीन्हा।
राम मिलाय राज पद दीन्हा॥ 16 ॥
तुम्हरो मंत्र विभीषन माना।
लंकेस्वर भए सब जग जाना॥ 17 ॥
जुग सहस्त्र जोजन पर भानू।
लील्यो ताहि मधुर फल जानू॥ 18 ॥
प्रभु मुद्रिका मेलि मुख माहीं।
जलधि लांघि गए अचरज नाहीं॥ 19 ॥
दुर्गम काज जगत के जेते।
सुगम अनुग्रह तुम्हरे तेते॥ 20 ॥
राम दुआरे तुम रखवारे।
होत न आज्ञा बिनु पैसारे॥ 21 ॥
सब सुख लहै तुम्हारी सरना।
तुम रक्षक काहू को डर ना॥ 22 ॥
आपन तेज सम्हारो आपै।
तीनों लोक हांक तें कांपै॥ 23 ॥
भूत पिशाच निकट नहिं आवै।
महाबीर जब नाम सुनावै॥ 24 ॥
नासै रोग हरै सब पीरा।
जपत निरंतर हनुमत बीरा॥ 25 ॥
संकट तें हनुमान छुड़ावै।
मन क्रम बचन ध्यान जो लावै॥ 26 ॥
सब पर राम तपस्वी राजा।
तिनके काज सकल तुम साजा॥ 27 ॥
और मनोरथ जो कोई लावै।
सोई अमित जीवन फल पावै॥ 28 ॥
चारों जुग परताप तुम्हारा।
है परसिद्ध जगत उजियारा॥ 29 ॥
साधु-संत के तुम रखवारे।
असुर निकंदन राम दुलारे॥ 30 ॥
अष्ट सिद्धि नौ निधि के दाता।
अस बर दीन जानकी माता॥ 31 ॥
राम रसायन तुम्हरे पासा।
सदा रहो रघुपति के दासा॥ 32 ॥
तुम्हरे भजन राम को पावै।
जनम जनम के दुख बिसरावै॥ 33 ॥
अंतकाल रघुबर पुर जाई।
जहाँ जन्म हरिभक्त कहाई॥ 34 ॥
और देवता चित्त न धरई।
हनुमत सेई सर्व सुख करई॥ 35 ॥
संकट कटै मिटै सब पीरा।
जो सुमिरै हनुमत बलबीरा॥ 36 ॥
जय जय जय हनुमान गोसाईं।
कृपा करहु गुरुदेव की नाईं॥ 37 ॥
जो सत बार पाठ कर कोई।
छूटहि बंदि महा सुख होई॥ 38 ॥
जो यह पढ़ै हनुमान चालीसा।
होय सिद्धि साखी गौरीसा॥ 39 ॥
तुलसीदास सदा हरि चेरा।
कीजै नाथ हृदय मँह डेरा॥ 40 ॥
पवनतनय संकट हरन, मंगल मूरति रूप।
राम लखन सीता सहित, हृदय बसहु सुर भूप॥
Recommended
Songwriting Machine
high energy pop punk
Holistische Gesundheit
klassisch akustisch melodisch
命の歌
pop acoustic reflective
Love in Sky City
dreamy electronic pop
Dynamite Night
electric hard rock powerful
En Efsane Aşk
dramatik rock güçlü
Maybe
electronic pop
Рапунцель
happy metal, violin
Whispers in Yorkshire
alternative rock,rock,pop,indie pop,indie rock,bass
Ocean Love Spell
soulful electric psychedelic rock
Jump in the Rain
city pop, acid jazz, 트럼펫, wave
Clown Fiesta
playful pop
You're Falling for Me
hip hop electronic
Santhosham
Going to deep feelings with melody
Ajariku Melupakanmu By ARiandy
cinematic, epic, rock, guitar
Harmonies of the Night
jazz,cool jazz,post-bop,modal jazz